Followers

Monday 22 July 2013

आम 2

आम आ इंद्रधनुष्
गाछ पात फल सब हरियर
जेना हरियरे होए प्रकृतिक मूल रंग
मुदा सिनुरिया आ पीरबाक हस्‍तक्षेप
की लाल नइ प्रकृतिक रंग
की पीयर नइ प्रकृतिक रंग
सुक्‍कुल-सिपिया सेहो अपन पियरपन पर हुलसैत
तावते खसल दूधिया आ सफेदा मालदह
'हौ वौआ सब रंग हमरे सँ निकलैत '
ओमहर कलकतिया कलपैत
यद्यपि हम श्‍वेतक विलोम
मुदा हमरा बिना कोन कृष्‍ण ,कोन काली आ कोन अफ्रीका
बात पोलिटिकल भ' गेलै
आ आनो आम सब आबि गेलै अप्‍पन रंगक साथ
सभक अपन-अपन तर्क ,गोल आ ग्रूप रहै
केकरा मूल केकरा व्‍युत्‍पन्‍न कही
एतबे काल मे कतेको श्‍वेत वर्ण खंड-खंड भेलै
किछु इंद्रधनुष देखेलै
किछु बादले मे बिलाइत गेलै

No comments:

Post a Comment