जमेदार साहेबक असामी सोमन
बड्ड मुंहफट आ मजकिया
साहेब जखन जखन पादथिन
लजेबा क' जिमेवारी सोमनक छलै
आ साहेब डांटबाक रोल करथिन
' धुर जो सोमना
हरदम पदैत रहबें
ईहो नै जे टाईम बेटाईम देखी
ईहो नै जे कने कात एकात भ' जाए
आ ईहो नै जे कने सुपाच भोजन करी '
आ सोमना रहै नौटकिया
ओ एना लजाय
जेना पाद साहेबक पाछू सँ नइ
सोमनेक धोती सँ बहार भेल होए
आ सोमना ऐ कठपदानक कमाय
कखनो एक सेर दूसेर ,तीन कनमा
कखनो पाव भरि दूध आसेर मड़ुआ
आ जखन पेट भरलो रहै
तखनो सोमन एक्टिंग करै
काल्हिक लेल ,परसु तरसुक लेल
एही कठपदान मे साहेबो मरला
आ सोमना कें त' मरैये के छलै
आ आब पादनाय आ कठपादनायक'
जिमेवारी लेलखिन
साहेबक बेटा आ सोमनक बेटा
आ तहिना पादैत पादैत दूनू विदा भेला
देश आजाद भ' गेल छलै
बस ट्रक ट्रेन टी0वी0 क' भरमार छलै
साहेबक पोता आ सोमनाक पोता
दूनू गोटे आब फूलपेंट झाड़ैत छलखिन
मुदा पाद-कथा ओहने आ ओतबे
आ एकदिन सोमनक पोता सपना मे साहेबक पोता सँ कहलकै
'धुर जो साहेब तू पदना तोहर बाप पदना
कुल कुलदेवता आ खनदान पदना
एहन बिसेन पाद तूही पादि सकैं छें
एहन कलात्मक पाद तूही पादि सकैं छें
एहन पाखण्ड तूही क' सकैत छें
एक बापक बेटा हो त' कहि दे
आ दम हो त' कहि दे
हां ई पाद हमरे
ई दुर्गन्ध हमरे
ऐ व्यतिक्रमक अपराधी हम '
No comments:
Post a Comment